ШИНОСОИИ МУОВИНИ САРВАЗИРИ МАМЛАКАТ БО ВАЗЪИ СОҲАИ КИШОВАРЗИИ МИНТАҚАИ КӮЛОБ

Муовини Сарвазири Ҷумҳурии Тоҷикистон Зиёзода Сулаймон Ризоӣ бо рафти корҳои саҳроӣ, омодагии кишоварзон ба мавсими баҳории кишти зироатҳо, таъмиру тармими пойгоҳҳои обкашӣ ва тоза намудани заҳбуру заҳкашҳо дар ноҳияҳои Данғара ва Восеъ боздид ба амал овард.

Зимни шиносоӣ бо вазъи соҳа бо масъулин ва кишоварзон суҳбату мулоқотҳо доир гардида, зикр шуд, ки бо таваҷҷуҳи Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ҷиҳати рушди соҳаи кишоварзӣ тамоми шароиту имкониятҳои зарурӣ фароҳам оварда шудааст.

Аз ин лиҳоз, ки кишоварзонро зарур аст, ки ҳар қитъа заминро самараноку оқилона истифода намуда, барои баланд бардоштани ҳосилнокӣ ва тибқи дурнамои муайянгардида кишт намудани зироатҳо малакаву маҳорати худро истифода намоянд.

Ҳамчунин муовини Сарвазири Ҷумҳурии Тоҷикистон ба масъулини соҳаҳои дахлдор барои саривақт омода намудани пойгоҳҳои обкашӣ, вусъат бахшидани тозакунии заҳбуру заҳкашҳо, дар муҳлатҳои муқарраршуда додани озуқа барои зироатҳо ва фароҳам овардани шароити мусоид барои фаъолияти деҳқонон дастуру супоришҳо дод.

Таъкид гардид, ки кишоварзон бояд бештар барои кишти маҳсулоти содиротшаванда, махсусан пахта таваҷҷуҳи бештар зоҳир намуда, барои парвариши босифати он бо олимону мутахассисони соҳа ҳамкорӣ намоянд.

Дар ин зимн роҳбарони вазорату идораҳои дахлдор вазифадор гардиданд, ки барои боз ҳам бештар намудани ҳамкории институтҳои тадқиқотӣ, махсусан мутахассисони соҳаи растанипарварӣ бо деҳқонон тадбирҳои иловагиро роҳандозӣ намоянд.